Pan lai nun kha!

1980's hmêl hmu ve hman lo mah ila, kan ti nek nek a, puitling chu kan lo ni ve ta dêr mai!

Hringnun a hun hlimawm leh ngaihawm ber inzâwt ta ila 'pan lai nun' kan rilru in a kâwk rún hlawmin ka ring. Mahse kan naupan lai hun erawh a in ang lo hlawm hle in a rinawm.

Le, kan naupan lai hun ka lo share ve e, i hun tawn thenkhatte nen a inan chuan i lung a tileng ve in ka ring.

Ka mimal : Rannung lâwm em em mai ka ni a, ruah sur ban veleh pâwnah chhuakin thing leia mu apiang phawkin, a mak a maka tam changpât ka man khâwm thin. Ngatan nge ka tih ka hre tawh mai bik lo. Khau leh uifâwm hi ka insualtir ziah. Tuikhuah/dîl lem siamin uchang kan kháwi teuh zel.

Ram life : Sephung laiin kan insualtir a, trangtrial vehin kan ei thin. Zanah lah perhpawng chiri vih khalhin, kan ei thin bawk. Fur laiin mualah uchang kan veh bawk a. Ram lamah lah kan duai lo hle, sahdal, thangthlêng, fal, sakuh thang, thangchep te kan va kam nasa thin tak. Saihlum hrual kha kan hna pui pakhat ber a ni a, sava veh kan uar hle bawk. Chawlhni ah laiking leh khaukhuap kan veh thin.
Dar 3 ban apiang khan tuithehkang emaw sazu kaw ham leh laih kha kan ti deuh ngei ngei a. Furah aiawt chiah kan hrât em em bawk. Keimah bik hi fal lamah ka thian pahnih khatte nen kan tui zual a, kan veng lamah 'chîp-fal' chîng chhuak tu ka ni ziah. Ruahsur ban veleh a Pasawntlung veh te kha a va nuam thin tak.
Hmawng, taitaw, thalpîng, theikelêk, theikelki, thei buhfai, vawmva, theiria etc. ka sawi sêng lo, kan lo in kan va chhar nasa thin. Mautuai khawrh, baibing veh, thing chhêk khawl, lolem siam te kha a va nuam thin tak.
Tui chên te kha kan va lo peih thin tak! Vanvaah chhungte hriat lohvin, chêng tur ringawt ten kan kal thin, km 5 vela hlâ ah.
Sawi vek sen a ni dawn lo, a tlangpui thuak2 zel sawi ang.

Sikul nun : Ser, kawiâm/kawlthei emaw leh chithak pai kha chuan kan lungawi viau. Lakher den dip tui pai ngat phei chu, ziak loh phek mal kan dawng nasa thei hle. Kamis hmalamah suihin, chutah chuan kan thun thin, serpui pai kha chu kawr a puar duh bik teh e. Blade (razor blade) lah kha a tuiêk lam, hmun li vela phel sawm kan hmang a. Bân lâwk (recess) ah mipa kan inûm a, kan inkhel a, Hmeichhe lam an inkawibah a, an in rubber-zuan a, an in lungvawm a, an invawr a. Mipa kha kan chêp, kahphuk, tawlhpahrit, tawlailir, lirteng etc. kan jnfiamna ve kha min khap sak zel. Meizial zuk ruk, zan len vanga hrem kan tawk bâng lo. Classroom ep chiah awm te nen thlawhna (lehkhaa siam) in kan indo nasa thin hle..

Nakina chhunzawmah.. 

Comments

  1. Lung a va leng si emmm!!!!!!!😢😢

    ReplyDelete
  2. Ngaihtuah a va ti thui si em. Chaw tlang leh chi

    ReplyDelete
  3. Ngaihtuah a va ti thui si em. Chaw tlang leh chi

    ReplyDelete

Post a Comment