Thangkura drama party kha

Kum Zabi 21-na in ṭan chhoh lai vel khán Tape deck kan nei ve a, kan han play thûm ve dup dup mai kha a ni a, khang lai hun kha chuan Audio cassette ah khan kan lungawi, eng dang hi kan ngai bik láw! 

Zoram fiamthu khawvela ka mi ngaihsan ber te leh ka hriat hmasak berte chu Thangkura Drama Party kha an ni. An Audio cassette kha kan lei a, ngaihthla nasa tih piah lam a ni kan ngaihthlak nasat dan kha. Side 'A' tâwp dâwn te kha chu kan hai lo raps, a zawh rual deuh thaw in kan let ṭhin (Tape recorder tuipui phâ chuan in hriatthiam ka ring)! Chu mai a ni lo, an drama pakhat 'Khaw lo la awm tur' phei kha chu kan by-heart chhuak vek, Kura pû nuih dan thlengin. (Note, punctuation nena by heart thlap ang vel kan ni!) Kan ngaisangin, kan hlimpui hliah hliah.. Min nuihtir nasaa, min van àwi hneh ṭhin tak. An hmel ka hmuh châk ṭhin zia te kha âwww...

Thangkura te hi an nuihzatthlak piah lamah an fiamthu a zirtir/entir an zeh ṭhat theihzia te, ṭawngkam bungraw maksak leh mawi tak si an ching chhuak ṭhin te khan a tihlu zual hlein ka hria. 

Entir leh zirtir lama ṭawng hman dik te, politics te, khawtlang, mihring nun phung dik, kohhran/sâ khuana.. Etc an rawn pho lang ṭhin khan anmahni pawh hi 'Advance' tak, hawi zau leh hre tam an nih zia a tilang. Tehkhin nan, väiin Vanrama 'hmui hlir' a hmuh te kha, Pathian thuin, 'an kâ in mi chawimawi a, an thinlungin min hlat si' tih entir angin an han thlep kual lût zaih mai te kha a va 'special' tak!! 

Ṭawngkauchheh nalh tak tak, an thinrima an invauna mawlh mai te kha âw... 'ka ruahman ṭhuai mai tur che sin', 'ka engto ang che', 'ka inthlahdah ang e aw'.... 🤣 🤣 

Thangkura han zei, fin leh phakar ṭhin zia kha, a pû nen fiamthu ril leh entir /zirtir nei tak takin an indàwr vel ṭhin a nih kha. Ani hi a khaipa, thluak bur ber a nih avangin, Zoramah hian 'fiamthu khawvela' dah sàn ber páwl a hlawh reng fo vang. Ani hian Sudden Muanga min hriat chhuahtir fo.

Kura pû hi a zei a, a nuihzatthlak em em bawk. Puithu taka chan te leh Zohawpi lema chan te kha hneh tak hi a ni ringawt. Ani hi he drama tiphuisuitu ber a ni, a comedian ngawih ngawih, a hmel te thleng hian!

Churchuha kha ka nuih bâwm hawlh kehtu ber a ni, ani aia min nuihtir nasa thei hi Zofate zingah ka la hmu lo. A hmel ka hmuh hmaa ka lo riruat leh suangtuah dan zawng zawng nen an in ang chiah zui maw le, a hmel ka hmuh hnu hian. Chhurbura min tihre chhuak ṭhin. A ṭawng dan, a nuih dan, a mawl dan, a chhàw dan engkim kha a fuh vel vek. A tape recorder zuar mawlh te kha âww! Ani tel lo Thangkura drama ngaihthlak chu 'khuang loa chài ang' lek a ni ta ve ang. 

Vaipa lema chang pawh kha a sipisial in, a nechural tak zet. Tin, midang ka lam rîk loh, an chanchin sawi tur ka hriat loh te pawh, khati khawpa hlimna min siam sak ṭhin avang khan Chibai ka buk vek e. Pu R. Vanlalzaua te ka hre pha ve lo tlat bawk! Ka ziak buai nuaih mai, kim lo, famkim lo, an hlutna pu chhuak lo hle mahse duhtawk phawt maj te'ng! 

Kura chungchanga comment tur i nei a nih ngai chuan, insum suh, thlasik mau chang puah ve phawng phawng mai teh🤣