Sephûng laih Era

Sephûng laih hunlai ka hriat chian ve chu, kan sephûng laih chhuah insualtir /insiktirna tur kha sephûng leng tâwk velin lei kan lai khuar a, ('U' ang deuh hian a lai a thuk bikin kan lai a, a sir tawn tawn a pâwn chho telh telhin...) tichuan, sephûng pahnih a in hmachhawn in kan insiktir a, a chak zawkin a chak lo zawk a nawr chhuak ta ṭhin a ni. Chiang taka Sephûng laih hunlai vel ka hriat tawh loh avangin, mi ziah, a ziaktu phalna thlapin ka rawn dah e, ngaihnawm tak a ni. 

Maro Colneya Bungsut

Kum engemaw zah aliam ta. A hun leh ni kha sawi sen a nilo. Kumah pawh khan kum 8-10 in kar vel kan nih mek lai a ni ta ang.

Sikul ban rualin kan in au khawm a, nute Tuthlawh roh ber mai, a khansang chi ngei mai kha kan ru chhuak a, dai lamah kan liam a, kan tih tur chu Sephung laih a ni.

Ka unau pa, Ka nu nau chiah fapa Arama te bawng tlatna lam pan chu kan pana, kan panna chhan pawh nimin lama an Bawng ek chu a lo vung tawh ngei ang. Chu chu an bawng ek a nih avangin a 'hual' nghal bawk. Chu chauh chu hual kan nei bik lo, Sipai palian deuh e lai kan thianpa pakhatin a hmu a, a ek lai mek chuan, "Ka hual," a tih nghal avangin neitu nihna a nei nghal a. Vai ek a nih avang chuan Sephung pawh chal leh huai viau turah kan ngai.

Field liam lam chu kan pan hmasa ber a, Zo bawng ni ngeia rin, a ek pherh dan pawh khal lam leh kualte lam hi a lo vung tarh a, a vung pawh hmun hnihah chuan a chhuah nghe nghe. A that tak mialin kan han lai chhin ta a, Bawng ek chu kan han hai kiang chu kaw pathum alo awm tlat mai. A kua chu a lian lem lo, mahse, kan lai ta tho a, 'Kawlphung' ki neilo chi a lo ni. Chutiang Sephung ki neilo chu kan tan awmzia a awm loh avang chuan kan sat sawm ta nghala, a dang lai tur chuan kan kal leh ta a.

Vaipa ek kan laih hma chuan Sial ek ni tur awm tak hi a lo vum thur mai. A tlang sirah chuan vung thar lam tak hi alo chhuah hring sarh maia. Kan phur tlang ngang mai. Tiang anga vung chhuah tha hi chu a ki a chal ngei ngei thin. Sial ek chu kan han hai then phawka, a lu lamah chuan awm kan phal teuh lo. A chhan pawh 'Meihawl' a a chanpalh kan hlau. A kua chu a bo mai loh nan hmawlh nem lam chu kan han hawlh lut hmasa te te a, laih chhiat palh hlau tak chuan kan lai ta a.

A kua chu kan han kher zau chuan Sephung thla tliang dum hlarh mai chu alo lang ta. Dim taka hai zelin a tak chu kan han hmu a, a ki chu a tha ngang mai. A pa ki chal chi ngei mai, a hmui chunglamah chuan Zum tha fahran mai hian a ki chu a to varh maia, a chal ding leh veiah pawh zum tawk tak a to bawk. Lactogen bur chhin nei chhungah kan han khung ta hmaka. Boruak a luh theihloh nan a chhin chu kan chhu pawp siar siar bawk.

Mihring ek hi a huai duh avangin laih chhuah ngei kan duh thin. Tuna kan laih tur hi chu Vai palian ek kher a ni bawka, huai viau turah kan ngai. A vung chu kan han en a, tlem chuan a hlui deuh tawh. A nu nen an awm dun hman chuan a dawih palh hlauh thei bawk.

A hualtu chuan a lai dawn ta a. A tuthlawh chuan a han thai sawn a, kei niho chuan kan lo thlir thap a. A bul velah chuan sephungte tak takin kua an hreuh nual a. Lei chu a han rit khawk nghal hlawk a, a kaw hnawhtu lei chu a kut zungchal chuan a pir fai nghal zung zung bawk.

A thla chu laih chhiat palh a hlauhawm avangin a cheh pawn a chek ngam lo, muang chang chuan a rit khawk hlawk hlawk a. A kawpui ni awm tak hi alo siama, chutah chuan a chaw dah khawl ni awm tak a lo awm bawk. A tak laih chhuah a hnaih tawh avang chuan dim leh zual chuan a han lai leh a. A kua chu a bo ta tlat mai. A kua chu a kut chuan a han zen kual zung zunga, a chaw dahkhawl ni awm tak a 'Vaipa ek' nia hria chu a kawm pherh hlawih hlawih a, chutiang a kut a kai chu phuihnamchhe hnah chuan a hru fai nawk nawk a.

Chutia Sephung laih mawlh mawlh lai chuan chunglamah Mu a rawn thlawk ding ngar ngar mai. Kuta Mihring ek kai luai chu hman hmawh fahran hian ke kawr mawngah a han tat fai nawk nawk a, kut chang tum hman loh hlau chuan a han buai leh rih. Chutianga mu thlawk lai lo chang tum hman ngei chu naupang tan chuan tih makmawh tak a ni.

A nu nen chuan kaw dang an hreuh a nih kan ring rum rum tawh. A han hai fai deuh chu a zen lohna daihah chuan a kua chu alo awm niin, a han hawlh a, zungchal chen velah a kua a tawp avang chuan a tak a awm hnai a nih kan ring ta a. Kan han lai leh chuan rin ang ngei ngei chuan Sephung chal nalh fahran mai, Sial ek a mi aia chal zawk tur hi a lo bawk dum run mai. Kan han la chhuaka, a thla velah chuan a hrik chuan a lo zam mer mer a, chutiang khawpa chal chu U Valpuia te pawn an la lai chhuak teuh lo. U Hruaia Mihring ek laih chhuah ai pawn a that kan ring hial. A lai chhuak tupa chu a hlim ngei mai.

Bawk ek vung dang kan hualna lam pan chuan kan kal leh ta. Nimin lamah vung pakhat chauh a chhuah laiin vung pathum lai mai a chhuah tlat. Kawlphung a nih kan hlau khawp mai. Kan han lai deuha, a kua chu a lo bir ngang mai. Pakhat chu laih bir angai dawn tih a hriat nghal maia. Mahse, tihdan kan hre chhuak hlauh. Tuiin kan birh mai ang, tui pawh chu kan zun a ni ang. Kaw khatah chuan a nu pakhat leh a pa pahnih, a ki chal lutuk lo chu kan lai chhuaka, a kaw bir ber birh tur chuan a kua chu kan han hai rem a. A kuaah chuan kan zung lut ta a, pakhat chuan thingthi rapin, a kekawr bul kawng atang pawh nilo, a malpui sir atanga a Sazu la chhuakin a han birh barh barh a, a zun zawng zawng chu alut zo duak mai.

Sephung chu ala rawn chhuak mai lo. Zun theih ngei tum chuan kan han in sawm khawm hlawma, ka han zung ve leh ta a, thawk ka han la haka, chumi rual chuan kan pum lam chuan ka phing nek sawr nasa thei ang ber tur chuan ka sang ta vaka, a khawh chhuak zawka, Sephung kuaah chuan zun chu a lut thla bawrh bawrh a, ka zun zawh rual chiah chuan an rawn zung veleh chiah... Chutah zet zawng Sephung tan tawm reng ngaihna a awm ta lo. A ko tlangah chuan a rawn vak chhuak ta hlawl mai a.

Chung kan Sephung laih chhuah ho chu anmahni leng tawk chauha lei lai khuarin kan han in sik tir ta. Khawvel zawng zawnga hmuhnawm ber a ni awm e. Greek mi chakte insual en aiin Sephung insik tir hmuhnawm kan ti zawk ta ve ang.

Sephung laih nikhuain Mihring ek leh Bawng ek kawm pherh hlawih hlawih mah ila, kut sil mang hlei lo khan chhun riltamah chawtlang lek lian lian kan ni leh tho. Sephung laihna kut berhin Kawlthei kan lo a, kan thil ei a tui loh phah chuang lo.