Thinlung veng ṭha rawh

Kan pi leh pu te khan chhiat nî leh zualko thü hlä-ah khan thü an khuhin, ṭawngkam an uluk ṭhin hle. Chhiat tâwk chhungkaw tána tawrh hrehawm tur kha an chhak chhuak khât hle àwm e. Kan Zo nun-ze-mawi kha a lo va Kristian tak ém!
Tunah erawh kan danglam zo ta! Social media te hian kan Kristianna a pawlh dal tâ emaw ni! Kan nuna veiawm ka tih em em pakhat chu, miin a tâwpna tâwp khawk (thihna) meuh a thlen hnua kan chirh-theh zui dan hi a ni.
Mi chhiatnaah, kan ṭawng thlamuan thei lo a nih pawhin, sawisel zui a, chirh-theh zui chiam chiam hi thil ṭul lo tawpkhawk a ni. Chhung khat laina tân a na dawn lutuk, dàwnpui ve ta che! Ṭawngthuchhe lovah, i chhungte'n thihna tâwk ve palh se, midang i elhsen dan chiah khan rawn elhsen ve che u se, in pái dài thei ang e maw!?
Tunlai hian in hmu ve fo ang e maw... Social media group ṭhenkhata mi thihna an khel zui dan hi... 'a chawh lutuk', 'ka ten lutuk' etc..tiin kan elhsen zui a, kan pawi a sawi ta emaw tih mai turin kan insawh thinrim vêl a, Uak! A 'Kristian lo' mai pawh a ni lo, a 'mihring lo' hliah hliah hian ka hre ṭhin!
Thil dang zawng aiin kan thinlung hi i veng ṭha nawn leh ang u. Kan thinlung kan vèn hneh phawt chuan, kan lei te, kan kut te chu kan thunun thei sâ!
Tin, misual/nun khawlo i tih deuh te pawh an nun i vei tak tak a nih ngai chuan, an dam laiin sawisel la, puih an ngaihna kawngah puih tum la, a sâwt zawk ngei ang. Chuti ni si lova, hetia, a sâwt tawh loh hnûa intih zui vak vak hi chu a 'Rûl' zía ém mai!!